Ten vostede, grazas aos seus coñecementos filosóficos, o seu primeiro contrato de prácticas na «Fundación: Filosofía social e Comunicación» destinada principalmente a divulgar a actualidade e vixencia do pensamento dos grandes filósofos/as. O seu xefe entrégalle o seguinte fragmento do coñecidísimo e sempre actual documento público: a Constitución española. Respecto diso, pídelle a vostede que prepare unha disertación para o Boletín mensual da Fundación. Vostede lembra ben a filosofía de Locke, a súa concepción do Estado e as súas consideracións sobre os réximes políticos (liberdade natural, sociedade civil, dereito, absolutismo e contractualismo) e a súa soada cita: «Aínda que o estado natural sexa un estado de liberdade, non o é de licenza». Relacióneo co documento e elabore esa disertación que lle solicitaron co título: «Estado: liberdade e contractualismo». Extensión máxima: 20 liñas. (2 puntos)
Documento: Constitución española.
Preámbulo: A nación española, desexando que se estableza a xustiza, a liberdade e a seguridade e que se promova o ben de cantos a integran, no uso da súa soberanía, proclama a súa vontade de: (…) Consolidar un Estado de Dereito que asegure o imperio da lei como expresión da vontade popular.
Artigo 1: punto 2: A soberanía nacional reside no pobo español, do que emanan os poderes do Estado.
Artigo 9: punto 2.- Correspóndelles aos poderes públicos promoveren as condicións para a liberdade e a igualdade do individuo (…).
Artigo 66: punto 2.- As Cortes Xerais exercen a potestade lexislativa do Estado.

2.1. Lea detidamente este texto referido a «Cosmos, realidade e coñecemento en Platón (do mito ao logos)». Elabore un comentario filosófico explicando o seu contexto, tema central, ideas principais e conceptos clave. (4 puntos)
—Toma agora unha liña dividida en dúas seccións desiguais e de novo corta estas dúas partes, segundo a mesma proporción, a da especie que é visible e da que é intelixible, e terás a claridade e a escuridade en relación a ambas, na visible atoparás unha sección de imaxes. Doulle o nome de imaxes, en primeiro lugar, ás sombras, e despois aos reflexos na auga e en todo canto se constitúe como compacto, liso e brillante, e, se me entendes, a todo o semellante a iso.
—(…).
—Verdadeiramente estarías disposto a declarar que a liña quedou dividida en canto á súa verdade e non verdade, de modo tal que o opinable é ao cognoscible como o é a copia respecto do que é copiado?
—Por suposto que si.
—Pois considera agora se tamén hai que dividir a sección do intelixible.
—E como?
—Deste modo: por un lado, a alma, servíndose das cousas antes imitadas como se fosen imaxes, vese obrigada a buscar a partir de hipóteses e non se dirixirá a un principio, senón a unha conclusión. E, por outra parte, avanza ata un principio absoluto, partindo de hipóteses e sen imaxes, facendo o camiño coas ideas mesmas e por medio delas.
—(...) Comprendo que ao que te refires é á xeometría e ciencias irmás.
—Comprende, entón, a outra parte do intelixible, cando digo que iso a razón mesma alcánzao co seu poder dialéctico, facendo hipóteses non como principios, senón como hipóteses reais, que son puntos de apoio e de partida para levala ao principio de todo ata o absoluto. Unha vez alcanzado ese principio, dedicándose de novo ás cousas que dependen dela, descenderá ata a conclusión, sen servirse en absoluto de nada sensible, senón das ideas mesmas, a través delas cara a elas mesmas, rematando con ideas.
—(...)
—Comprendiches perfectamente. Aplica a esas catro seccións catro afeccións que se xeran na alma: intelixencia, á máis elevada; pensamento discursivo, á segunda; á terceira, a crenza; e á última, a conxectura; ordénaas segundo unha proporción, pensando que canto máis participen da verdade, tanto máis participan da claridade. PLATÓN: República, Libro VI, 509c-511e.

3.1. Tendo en conta afirmacións como: «A igualdade (...) non nos vén dada, senón que é o resultado da organización humana» ou «a liberdade é a razón de ser da política», explique o problema fundamental na cuestión: «A crítica ao totalitarismo. A condición humana en H. Arendt». (3 puntos)

4.1. Discrimine en dúas columnas os seguintes conceptos, atendendo aos sistemas filosóficos que refiren: (0,5 puntos)
res cogitans / Empirismo / experiencia / método / causalidade / Racionalismo / evidencia.
4.2. Responda un destes dous subapartados:
4.2.1. Defina, en non máis de tres liñas, o concepto: res cogitans. (0,5 puntos)
4.2.2. Defina, en non máis de tres liñas, o concepto: Empirismo. (0,5 puntos)