Responda indicando e xustificando a opción correcta:

1.1. Unha partícula cargada móvese espontáneamente cara a puntos nos que o potencial electrostático aumenta. O signo da carga eléctrica será: a) negativo; b) positivo; c) non se pode saber.

1.2. Cando unha onda harmónica esférica se propaga no espazo, a súa enerxía é: a) inversamente proporcional á frecuencia; b) proporcional ao cadrado da amplitude; c) inversamente proporcional ao cadrado da distancia ao foco emisor.

Responda indicando e xustificando a opción correcta:

2.1. A imaxe que se obtén ao situar un obxecto diante dunha lente diverxente a unha distancia igual ao dobre da distancia focal é: a) virtual, dereita, igual; b) real, dereita, menor; c) virtual, dereita, menor.

2.2. Na reacción $^{235}_{92}\mathrm{U} + ^{1}_{0}n \rightarrow {}^{141}_{56}\mathrm{Ba} + {}^{A}_{Z}\mathrm{X} + 3\,^{1}_{0}n$ cúmprese que: a) é unha fusión nuclear; b) ponse en xogo unha gran cantidade de enerxía correspondente ao defecto de masa; c) ao elemento X correspóndelle o número atómico 36 e o número másico 94.

Responda indicando e xustificando a opción correcta:

3.1. A forza electromotriz inducida nun circuíto tende: a) a diminuír o fluxo magnético que atravesa o circuíto; b) a aumentar o fluxo magnético que atravesa o circuíto; c) poden ser correctas as dúas opcións anteriores.

3.2. Un astronauta viaxa nunha nave espacial con velocidade constante $\vec v$ respecto a un observador que está en repouso na Terra. O astronauta mide a lonxitude $l$ (que coincide coa dirección de $\vec v$) e a altura $h$ da nave. As medidas da lonxitude $l'$ e altura $h'$ que fai o terrícola serán: a) $l' < l$ y $h' < h$; b) $l' < l$ y $h' = h$; c) $l' > l$ y $h' > h$.

Desenvolva esta práctica:

No laboratorio de física móntase un experimento para determinar o índice de refracción dunha lámina de vidro facendo incidir raios de luz con distintos ángulos de incidencia $\theta_1$ e medindo en cada caso o ángulo de refracción $\theta_2$.

a) En que lei física nos basearemos para facelo?
b) Determine o índice de refracción da lámina a partir dos datos experimentais amosados na táboa.

Resolva este problema:

O período de Xúpiter na súa órbita ao redor do Sol é aproximadamente 12 veces maior que o da Terra na súa correspondente órbita. Considerando circulares as órbitas dos dous planetas, determine: a) a relación entre os radios das devanditas órbitas; b) a relación entre as aceleracións dos dous planetas nas súas respectivas órbitas.

Resolva este problema:

Unha partícula de masa 8 ng e carga eléctrica $-2\ \mu$C entra nunha rexión do espazo na que hai un campo magnético $\vec B = 3\,\vec j$ T, cunha velocidade $\vec v = 6\,\vec i$ km·s$^{-1}$. Calcule:

a) a velocidade angular con que se move;
b) a intensidade de campo eléctrico (vector) que se debe aplicar para que a partícula siga unha traxectoria rectilínea.

Resolva este problema:

Nunha célula fotoeléctrica, o cátodo ilumínase cunha radiación de lonxitude de onda $\lambda = 3\times 10^{-7}$ m. a) Estude se a radiación produce efecto fotoeléctrico, considerando que o traballo de extracción corresponde a unha frecuencia de $7{,}0\times 10^{14}$ Hz. b) Calcule a velocidade máxima dos electróns arrancados e a diferenza de potencial que hai que aplicar entre ánodo e cátodo para que se anule a corrente fotoeléctrica.

Datos: $|q_e| = 1{,}6\times 10^{-19}$ C; $m_e = 9{,}1\times 10^{-31}$ kg; $c = 3\times 10^{8}$ m·s$^{-1}$; $h = 6{,}63\times 10^{-34}$ J·s.

Resolva este problema:

A expresión matemática dunha onda harmónica transversal que se propaga por unha corda tensa orientada segundo o eixe x é: $y = 0{,}5\,\mathrm{sen}\,[2\pi\,(3t - x)]$ (unidades no SI). Determine:

a) os valores da lonxitude de onda, velocidade de propagación, velocidade e aceleración máximas de vibración dos puntos da corda;
b) a distancia mínima que separa dous puntos da corda que nun mesmo instante vibran desfasados $2\pi$ radiáns.