Dados os elementos A e B con números atómicos 19 e 35, respectivamente:
1.1. Escriba as súas configuracións electrónicas e razoe cal ten maior radio e cal posúe maior afinidade electrónica.
1.2. Xustifique que tipo de enlace se podería formar entre A e B, que fórmula empírica lle correspondería ao composto resultante e indique algunha propiedade do composto formado.

2.1. Razoe mediante as reaccións correspondentes o pH que terán as disolucións acuosas das seguintes especies químicas: NaNO₃ e NH₄NO₃.
2.2. Aplicando a teoría de repulsión dos pares de electróns da capa de valencia (TRPECV) xustifique a xeometría electrónica e molecular das seguintes especies: tetrafluoruro de carbono e tricloruro de arsénico.

3.1. Complete as seguintes reaccións nomeando todos os produtos orgánicos presentes nelas, tanto reactivos como produtos, e indique a que tipo de reacción se corresponden:
CH₃-CH₂-CH₂-COOH + CH₃OH →
CH₃-CH₂-CH₂-CH₂OH → (K₂Cr₂O₇, H⁺)
3.2. As temperaturas de fusión dos halóxenos que se observan experimentalmente son: F₂ −218°C, Cl₂ −101°C, Br₂ −7°C, I₂ 114°C. Xustifique razoadamente estes valores.

Considere o seguinte equilibrio: CO₂(g) + H₂S(g) ⇌ COS(g) + H₂O(g). Introdúcense 4,4 g de CO₂ nun recipiente de 2 L a 337 °C e unha cantidade suficiente de H₂S para que, unha vez alcanzado o equilibrio, a presión total sexa de 10 atm. Se na mestura en equilibrio hai 0,01 moles de auga, calcule:
4.1. As concentracións de cada unha das especies no equilibrio.
4.2. Os valores de Kc e Kp á devandita temperatura.

A 25 °C disólvense un máximo de 0,07 g de ioduro de chumbo (II) en 100 mL de auga. Calcule:
5.1. A concentración de ións chumbo (II) e ións ioduro nunha disolución acuosa saturada.
5.2. O produto de solubilidade (Kps) do ioduro de chumbo (II) a 25 °C.

O catión ferro (II) pode ser oxidado tal como ocorre nesta reacción: KMnO₄ + FeCl₂ + HCl → MnCl₂ + FeCl₃ + KCl + H₂O
6.1. Axuste a ecuación iónica empregando o método do ión-electrón e escriba a ecuación molecular redox axustada.
6.2. Sabendo que se empregaron 26,0 mL dunha disolución de permanganato de potasio de concentración 0,025 M para valorar 25,0 mL dunha disolución que contén Fe²⁺, calcule a concentración da disolución de Fe²⁺.

Emprégase unha disolución de ácido nítrico de riqueza 2% en masa e densidade 1,009 g·mL⁻¹ para neutralizar 50 mL dunha disolución 0,25 M de hidróxido de bario.
7.1. Escriba a reacción química que ten lugar e calcule o volume da disolución de ácido nítrico gastado.
7.2. Describa o procedemento experimental e nomee o material necesario para realizar a valoración.

Constrúese no laboratorio unha pila galvánica con eléctrodos de Au e Cd.
8.1. Escriba as reaccións que teñen lugar nos eléctrodos indicando: o ánodo e o cátodo, a reacción global e a forza electromotriz da pila.
8.2. Faga un esquema detallado da montaxe da pila no laboratorio, indicando material, reactivos e o sentido do fluxo dos electróns durante o funcionamento da pila.
Datos: E°(Au³⁺/Au) = +1,50 V; E°(Cd²⁺/Cd) = −0,40 V