[2 puntos (1 punto por apartado)].
1.1. Dada a seguinte afirmación, xustifique razoadamente se é verdadeira ou falsa: "O raio atómico do bromo é maior có do potasio"
1.2. Discuta razoadamente quen ten maior punto de ebulición o etano ou o etanol.

[2 puntos (1 punto por apartado)].
2.1. Tendo en conta que a xeometría electrónica do BeCl₂ é lineal, explique razoadamente que orbitais híbridos empregará o átomo de berilio para formar os enlaces na molécula, indicando como se forman os ditos orbitais híbridos e a distribución de electróns nestes.
2.2. Discuta razoadamente se é certo que segundo a teoría de repulsión dos pares de electróns da capa de valencia a molécula de cloroformo, CHCl₃, é tetraédrica e presenta un momento dipolar distinto de cero.

[2 puntos (1 punto por apartado)].
3.1. Dadas as seguintes parellas de moléculas, nomee ou formule cada especie segundo corresponda, e razoe se en cada parella as moléculas son isómeros entre si, e de ser o caso indique o tipo de isomería:
3.1.1. Acetato de metilo e CH₃-CH₂-COOH
3.1.2. CH₃-CH₂-CH₂OH e propan-2-ol
3.2. Dadas dúas disolucións de igual concentración inicial de dous ácidos monopróticos débiles HA e HB, compróbase que tras alcanzar o equilibrio a concentración [A⁻] é maior ca [B⁻]. Razoe se son certas as seguintes afirmacións:
3.2.1. O valor da constante de disociación do ácido HA é menor có valor da constante do ácido HB.
3.2.2. O pH da disolución do ácido HA é maior có pH da disolución do ácido HB.

[2 puntos (1 punto por apartado)].
Nun matraz de 5 L introdúcense 0,80 moles de N₂ e 0,40 moles de O₂ e quéntase a 2.200 K, establecéndose o seguinte equilibrio: N₂(g) + O₂(g) ⇌ 2NO(g). Tendo en conta que nesas condicións reacciona o 1,1 % do N₂ inicial:
4.1. Calcule o valor da constante Kc.
4.2. Calcule a constante Kp e discuta razoadamente que sucederá no equilibrio se aumentamos a presión do sistema.

[2 puntos (1 punto por apartado)].
O ácido sulfúrico reacciona co cobre dando lugar á obtención de sulfato de cobre(II), dióxido de xofre e auga.
5.1. Axuste as ecuacións iónica e molecular polo método do ión-electrón.
5.2. Calcule o volume de dióxido de xofre que se obterá, medido a 55°C e 1 atm de presión, se facemos reaccionar 2 mL de ácido sulfúrico comercial do 96% de riqueza en peso e densidade 1,84 g/mL con cobre en exceso.

[2 puntos (1 punto por apartado)].
6.1. Determine a entalpía de formación estándar do eteno a partir dos seguintes datos:
C₂H₄(g) + 3 O₂(g) → 2 CO₂(g) + 2 H₂O(l) ΔH° = -1.409 kJ/mol
C(s) + O₂(g) → CO₂(g) ΔH° = -393,6 kJ/mol
H₂(g) + ½ O₂(g) → H₂O(l) ΔH° = -286 kJ/mol
6.2. Xustifique se a reacción de formación do eteno será espontánea a algunha temperatura.

[2 puntos (1 punto por apartado)].
Mestúranse 20 mL dunha disolución de cloruro de bario 1,0 M con 50 mL dunha disolución de sulfato de potasio 1,0 M obténdose cloruro de potasio e un precipitado de sulfato de bario.
7.1. Escriba a reacción que ten lugar e calcule o rendemento da reacción se se obteñen 3,5 g de sulfato de bario.
7.2. Explique detalladamente como procedería no laboratorio para levar a cabo a separación do precipitado obtido empregando unha filtración a baleiro, indicando todo o material necesario.

[2 puntos (1 punto por apartado)].
Dunha disolución 4,0 M de hidróxido de magnesio tómanse 50,0 mL e dilúense con auga ata un volume final de 250 mL. A continuación úsanse 15,0 mL desta dilución para valorar 20,0 mL dunha disolución de ácido clorhídrico.
8.1. Escriba a reacción que ten lugar e calcule a molaridade da disolución do ácido.
8.2. Describa o procedemento que empregaría para levar a cabo a valoración indicando o material necesario.